台灣詩人向陽的詩網站，提供向陽現代詩、童詩、數位詩之作品與相關評介
倒面加正面

向上
鏡內底的囝仔
倒面加正面
共款和精差
早時連暗時
有影的參無影的
大的抑是細的
夢見我的鏡
鏡是一片門
鏡的爸爸媽媽
給鏡講的心內話

 ●向陽

鏡內底的囝仔
和我生做真共款
我會笑
伊嘛會笑
我會結目頭
伊嘛會結目頭
我會使目尾
伊嘛會使目尾
我會裝魈鬼仔面
伊嘛會裝魈鬼仔面

鏡內底的囝仔
和我生做又擱無共款
我的正面
是伊的倒面
我的倒耳
是伊的正耳
我用正手提齒皿
伊顛倒用倒手
連我的齒膏面頂寫的字
伊嘛給我顛倒旋過來

我的倒面
伊的正面
到底我的倒面是正的
抑是伊的正面是倒的
真想欲給伊摒過來
和伊比並一下
看是伊卡正？
抑是我卡正？　

　

註

倒面：左面，也有反面的含意。
加：與，以及。
正面：右邊，也有正面的含意。
真：非常，實在。
結目頭：皺眉頭。
使目尾：使眼色。
魈鬼仔面：鬼臉。
無共款：不一樣。也可以寫成「無相款」。
倒耳：左耳朵。
正耳：右耳朵。
正手：右手。
提：拿，提。
齒皿：牙刷。
顛倒：反而，反過來。
倒手：左手。
齒膏：牙膏。
面頂：上面，上頭。
給：把，將。
旋過來：轉過來。
欲：要。
摒過來：翻過來。
比並：比賽，較量。
卡：比較。
抑是：或是。
　
　

                                                ®向陽詩房. All rights reserved. Email:hylim@ms21.hinet.net